امسك عريس

كنت ماسكه كوباية لبن بشرب فيها_لبن بخيره من ابو تلاته جنيه_وقاعده سرحانة في حال البلد،يعني لما يموت في ماتش كورة اكتر من 130 واحد ده غير حوالي 1000 مصاب ولما يموت من اول ما الثورة ابتدت لحد دلوقتي حوالي 1500 او 2000 ده غير المصابين اللي تجاوز العدد ده وزيادة وما خفي كان اعظم،معني كده ان حتي افتراضا لو جالي عريس يااما هيبقي أعمش من كتر الغازات السامة اللي اثرت علي عينيه او هيبقي مكسح يااما اعمي فقد عينيه ولو جيه سليم هيبقي اخرس من كتر اللي شافه.
بيني وبينكم بدءت اتوغوش عماله اسمع اصيب فلان،قتل علان ان ما سمعت اصيبت فلانه،قاعدين متبتين فيها ليه يابنات؟؟.المهم كالعادة حضرت هدومي علشان انزل ادور علي شغل ده علي اساس ان البلد فيها شغل اصلا!!!!!!!!!!!!!!!! بس اهو الواحد بيعمل اللي عليه،بينزل يلف علي رجليه وبعدها يرجع بيجر وراه ازيال الفشل(بذمتكم حد فكر يعني ايه ازيال الفشل قبل كده؟
وانا بلبس سمعت اخويا بيحب في التليفون (معلش اصله ليبرالي) وعمال يقولها عايزه الهدية ايه ياحبي وان شاء الله نتقابل عند كوبري قصر النيل ياعمري، الجلاله راحت وخداني فقولتله:

انا:مش عيب تحب بنات الناس في التليفون وتعاكسهم اتق الله يااخي،انت مش خايف حد يعاكسني وياخدني لطريق الرزيلة؟
هو:بصلي من فوق لتحت وقالي اموت واشوف مين المغفل اللي هيبصلك،اتكلي علي الله من قدامي ده اللي هينتص في نظره ويفكر يتجوزك هيبقي انقذني وانقذ امك وابوكي وضحي بروحه


انا اتنرفزت من هذا الليبرالي المتعفن وقولتله والله لاقول لعمو علي الكلام ده(ده علي اساس ان عمو مرشد الاخوان بس بتاع العائلة هندنا) اتصلت بعمو احكيله رد علي وقال:
يابنتي ما عنده حق وبعدين فكرة انك تتجوزي دي لوحدها ممكن تتعمل فيلم خيال علمي وهيعمل اعلي ايرادات وياسلام بقي لو خلفتي ده هيبقي الجزء التاني بس فيلم رعب بقي.
ايه الناس المستفزه دي؟؟؟؟؟؟؟؟؟؟؟؟؟؟؟؟؟ طيب بكرة تشوفوا يوم لما افوز بعريس هيجري ايه،اه اصل فكرة الحصول علي عريس اليومين دول زيها زي فكرة الحصول علي انبوبه حاجة من المستحيلات يعني،المهم انا ماشية في شارعنا قابلني واحد كده ينهار قمر وعيون رومادي وشعر مصفر،وقفني في الشارع وقالي لو سمحتي،اول ما سمعت لو سمحتي كان هيغم عليا.

رسمت الوش الخشب وقولتله حضرتك عايز ايه؟ انا متأخرة علي الشغل (علي اساس اني مديرة مارجيح مولد النبي مثلا،ما انا مش ورايا حاجة) رد بكل ادب وقلي انا هاسأل علي حاجة،رحت قولتله لا انا مش مرتبطة،قالي نعم؟؟؟؟؟؟
قولتله اقصد اتفضل اسأل انا مش مرتبطة بمواعيد مهمة يعني،ولاقيته بيقولي اصل انا جاي اخطب واحدة هنا اسمها قمر ومش متأكد من عنوان بيتها ده حتي انا لسه ما شفتهاش.

لاقيت عمو الشيطان بيقولي ده جالك في ملعبك مسمريه واوعي تسيبيه
قولتله حضرتك فجأتنيني انا قمر،استغرب وقالي انتي قمر؟؟؟ قولتله اه هو انا هاكدب علي حضرتك،راح قالي لا لا العفو طيب ممكن اجي البيت امتي؟،قولتله لو ينفع دلوقتي،بس لا لا ولا اقولك خليها بالليل الساعه 7 علشان الحق اقول لماما بردوا.
طيب حلاص موعدنا الساعه 7.
رجعت انا من نص الشارع اصل شعار بنات 2012 احنا مش عايزين حرية ولا هم عايزين نتجوز خلينا نتلم وضيف عليهم كمان بلا شغل بلا هم.
نبهت علي كل اللي في البيت ان انا اسمي قمر وانهم ينسوا بسنت ده خالص،كله عرف الحمد لله بس الواد احمد اخويا خرج مع لواحظ البت اللي بيحبها ومش موجود،يالا الهي ما يرجع دلوقتي بدل ما يطفشه ويقوله هيظلم نفسه والحوارات دي.
وجات الساعه 7 واذا بالجرس يرن،هو الشاب الاقمور ومعاه بوكيه ورد خرافه،اول ما دخل من باب البيت،قفز الي عقلي صورة بوكيه الفرح واخويا ماسك الشمعه وماشي ورايا وراح مولع في الفستان وجري،عيل مستفز!!!!
المهم قعد العريس وشرب الواجب بتاعه والحمد لله اتفقوا علي كل حاجة،واحنا قاعدين الباب خبط ودخل اخويا بشعره اللي مربيه وعامل زي الغوريلا وعامل يزعق:
قومي يابت يابسنت اعمليلي كوباية شاي،رحت بصتله اوي كده،راح مزعق انجري يابت هو انتي لا فالحة في طبيخ ولا لاقيه شغل انتي لازمتك ايه في البيت ده؟؟؟؟؟؟؟؟؟؟؟؟؟؟؟؟؟
راح العريس بصلي كده وقالي انتي مش اسمك قمر؟؟؟؟؟!!!! قولتله اه ما انا الصبح اسمي قمر وبعد الظهر بيقولولي بسنت
اخويا قاله قمر مين ياعم الحج انت اتعميت دي حتي حوله،المهم العريس بدء يقلق وراح قالنا هبقي ارد عليكم بعد اسبوعين،جريت علي المطبخ وجيبت سكينة وقولتله ولا بقولك ايه انت نهارك اسود لو خرجت من هنا،كتبت لامك وصية؟ وحتي لو ماكتبتش خليها تعتبرك شهيد في احداث بورسعيد.

قالي ابوس ايديك بلاش تموتيني،بيني وبينكم صعب عليا ،قلبي رق رحت سيباه بس طلع يجري علي السلم واتشنكل ووقع علي السلم ،هو تقريبا في العناية المركزة وحالته خطيرة وبصراحة لسه جايلنا خبره من شوية،كان يجري ايه لو سمع الكلام؟؟؟؟
كان علي الاقل هيخش دنيا،دلوقتي هيخش قبره يالا الله يرحمه،ادعوله

بقلمي

بسبوسه..البرنسيسه