أنا اتخطبت ياجدعاااااااااااااااااااااان!!!!!!!!!!!!!!!!!!!!!!

جئت إليكم اليوم ببيان ألقيه علي الأمة لتوضيح متغيرات الأمور وإرساء لقواعد الديمقراطية التي سنسير عليها في المرحلة القادمة (وبصراحة كده في جويا شوية مشاعر بايته لازم أطلعها وأفضفض معاكم شوية،أنا عايزه أقولكم حاجة بس عارفة إنكم مش هتصدقوني وبصراحة عندكم حق لو ما صدقتونيش أصل الكلام ده ممكن يتصدق في فيلم خيال علمي أو في عالم ما وراء الطبيعة ،إنما في الحقيقة لا أعتقد،أنا عذراكم إذا كان انا نفسي مش مصدقة!!!!!

وأنا قاعدة إمبارح قدامي اللب والسوداني وعمالة أقلب علي القنوات واستقريت علي متابعة المليونيات اللي أصابت البلد ما بين مؤيد ومعارض وحال البلد اللي لا بقي يسر عدو ولا حبيب ومرة واحدة لاقيتهم كاتبين عاجـــــــــــــــــــــــــــــــــل ونقلوا علي النشرة
قولت خير يارب ما يكونش حد اتصاب بخرطوش ولا مات من ضرب البلطجية ما خلاص بقي كل ده بقي عادي ولاقيت المذيعة بتقول:
أنباء جاءتنا من جميع مطارات مصر عن قدوم جسم فضائي غريب من كوكب زحل ويركب علي متنه شخص مجهول الهوية ولم يستدل علي شخصيته حتي الأن

أول ما قالت كوكب زحل قفز إلي ذهني صورة الدياسطي اللي خرج من كوكب الارض منذ 23 سنة متجها الي كوكب زحل لتكوين نفسه ولم يعد حتي الأن،فضلت أقول يارب توصله لبيتنا بالسلامة من غير ما ياخدوا جمارك علي الحاجة اللي جايبها معاه من زحل ويضيع تحويشة العمر.

وبالفعل ياجماعة كان هو الدياسطي اللي كانت أول مقابلة بيننا بعد العودة من زحل في مستشفي القوات المسلحة بالعجوزة ^_^
(وللي ما يعرفنيش أنا عمو مصاب ثورة وبقاله سنتين في المستشفي وأنا بروح أقعد معاه) وعلي ذكر القوات المسلحة والمجلس العسكري أقدر دلوقتي أكدلكم كل الأوشاعات اللي طلعت علي الإخوان والمجلس العسكري،بالفعل كان فيه صفقة بين الاخوان والعسكر (صفقة توريد عرسان) او بمعني أصح السماح للعروسان من أعضاء الجماعة بالمقابلة تحت حماية العسكر وعلشان كده خرجت الالالف من البنات في مظاهرات احتجاجية علي هذه الصفقة الدنيئة حاملين شعار"اتنين مالهمش امان العسكر والاخوان"

وتحت حماية العسكر ووسط مسمع مرئ جميع من حضروا اللقاء بيعنا دم الشهداء وخونا الثوار وكوشنا علي البلد أقصد المستشفي وكتبنا الدستور أقصد اتفقنا علي الخطوط العريضة اللي هتكون دستورنا في المرحلة القادمة.

وطبعا لأن أعضاء الجماعة زي ما الناس بتقول خرفان وبياخدوا أوامرهم من المرشد،لو قالهم يمين يبقي يمين ولو قال شمال يبقي شمال فكان لازم نكلم فضيلة المرشد نستأذنه في هذا القرار المصيري وهذه المرحلة الحرجة التي تمر بها البلاد.فالمرشد بطبيعة الحال اجتمع باأعضاء مكتب الإرشاد وكان القرار موافقة بالإجماع مع إني سمعت أخبار متسربة ان المهندس خيرت الشاطر أبدي بعدم الموافقة مااعرفش ليه بس أهم حاجة إن الأغلبية وافقت.

بس للأسف الحلو مايكملش كل قنوات الفلول والإعلام الفاسد روج لإشاعات وشحن المعارضة ضدنا وعلشان كده أعلنت القوي السياسية وحركات مناهضة لسياسة الجماعة عن الدخول في عصيان مدني مفتوح والنزول بمليونية سموها
"دي مش مستشفي أبوكم"

وده خلي الريس يضطر إنه ينزل قرار الخطوبة في استفتاء علي الشعب،ولاقيت مرة واحدة كل القنوات ومواقع الانترنت عاملة استفتاء بعنوان:

صوت علي قرار خطوبة بسنت والدياسطي
1-مؤيد
2-معارض
3-أنا مالي يكش يولعوا هما الاتنين

ووسط إنقسام شديد ما بين مؤيد ومعارض للقرار اتفقنا أنا والدياسطي إن حرية الرأي مكفولة لكل مواطن ومش علشان حد عارض قرار الخطوبة يبقي عدونا،حرية الرأي مكفولة لكل مواطن حسب الدستور الجديد.وعلي ذكر الدستور الجديد كنت قولت لعمو يحاول يقنعهم في التأسيسية انهم يحاولوا يمرروا مادة كده من تحت لتحت وهي:
تنص المادة 201 من باب عريس لكل فتاة علي أن الدولة تكفل لكل فتاة عريس ذو امكانيات معتدلة.

بس رجعت القوي المدنية اعترضت وقالت هتجوزوا البنات غصب عنها(ده علي اساس ان في عرسان اصلا علشان نجوزهم)،وسمعت خبر إن حمدين بيطالب بااعادة انتخابات الرئاسة بعد الاستفتاء علي الخطوبة،بس اللي طمني ان حوالي 95% من الشعب مؤيد لقرار الخطوبة الحمد لله.

وأخيرا اللي انا عايزه اوضحه انه بالعند في فلول النظام السابق والاعلام الفاسد اللي بيروج للاشاعات وبيشحن الناس واللي عايز يعرقل مسيرة البلاد أقصد الخطوبة إن شكولاته جلاكسي هي اللي بتخلينا نعدي الحاجات دي XD

وبالعند في كل دول أنا اتخطبت ياجدعااااااااااااااااااااااااااااااااااااااااااااااااااااااان

بسبوسه..البرنسيسه