أيون زي ما سمعتم بالظبط ما تقلقوش انتوا فهمتوا صح،أيوه أنا مش عايزه اتجوز انتوا مالكم،وأهو علي الأقل أفضيلكم مكان لوحدة تستفيد بالمغفور له اللي كان هيبقي من نصيبي بس هي هاتستني شوية أصله راح مشوار لكوكب زحل علشان يكون نفسه وتقريبا عجبه الحال هناك فقال أهي مستنية هاتروح فين وبصراحة عنده حق أصل الصنف شاحح في السوق وبقوا عملة نادرة واي واحدة معاها واد دلوقتي فاكرة نفسها بنت بارم ديله وعايزه تقعد وتنقي علي كيفها،ما علينا نرجع لموضوع ان انا مش عايزه اتجوز (انا مش عارفه اللي بتبصلي بقرف هناك دي مالها؟؟ يعني انتي ياختي شيفاهم واقفين طوابير اوي خالينا ساكتين بقي)
ومن الاسباب اللي كرهتني في الجواز واللي عايزين يتجوزوا ان الوحدة من دول تشوفك تقولك ايه ده؟؟؟؟ ما شاء الله كبرتي امتي ده انا لسه شيفاكي مافيش كم سنة كنتي بتلعبي مع العيال (معلش اصل كنت فاضية شوية فقولت اما اكبر،هي شغلانة ان الواحد يكبر يعني)
ولا بقي لما تقولك اشتغلتي ياحبيبتي؟؟؟ وتقوليلها لا،تقولك طيب مافيش حاجة في السكة كده واد حيلوة وابن حلال (لا والله تقريبا المحور واقف والدائري عليه حادثة)
ويكون الاجابة علي السؤال"أنا سعيدة انك سألتيني السؤال ده" بس في الحقيقة ياطنط لسه النصيب مجاش وبعدين انا ببذل كل ما في وسعي في الوقت الحالي في اني ادور علي شغل،فبطبيعة الحال هي هاتسأل طيب ولاقيتي شغل؟؟؟؟ فاهيكون الاجابة لا والله ياطنط ببذل مجهود بس!!!!!!!!.
ولا بقي لما واحدة تقولك ياختي انتي في نعمة رجالة هم كلهم بلا وكسة خدنا ايه من الرجالة غير المرار(انتي جاية تشيلني همك ياولية،أنا مالي ساقيكي المرار ولا ساقيكي تمر هيندي هي ناقصة ما كفاية اللي عندنا)
وبعدين أما هو ساقيكي المرار مستحملة ليه ما تسيبيه ولا هو ضل راجل ولا ضل حيطة ويامتجوزة وشيله الهم حالك أحسن من العانس اللي مش لاقيه غير امها ترمي عليها هم ما يتلم،وفي الاخر كله بيقعد جنب الحيطة ويسمع الزيطة
وياسلام بقي لما تقعدي مع واحدة من قاريبك وتقولك اوعي يابت تتجوزي في بيت عيله،أمه هاترمي عليكي الهم وبيتك هيبقي ميغة،لو تعرفي اللي انا شيفاه (ده جيلي انا بقي!!!! احكيلي هاتي اللي عندك يااوختي)
عاملين البيت بيت ابوهم أنا قرفت بقي جايبني الخدامة بتاعة ابوهم (وهي طبعا فكراني رئيسة مراجيح مولد النبي وهانصحها تعمل ايه...كنت نصحت روحي ياحبيبتي)
ولا بقي لما واحدة تقعد جنبك وتقولك لقب متجوزة احسن من عانس وبعد كده كله في الاخر واحد هاتقعدي جنبينا برده وتقولي المنيل قالي والمنيل عادلي فالحقي اشبطي في حد بدل ما تلزقي في رقبتنا.
ولا بقي لما واحدة تقولك ياختي ده قرفني ومطلع عيني ده انا صابره غلب،هو المرتب اللي بيدهولي ده ي؟أكل عيش حاف ده انا في شبابي اتقدملي ناس كتير بس هو بختي اللي وقعني فيه اما مرة يدخل عليا بكيس جوافة،اسكتي بلا هم ده انتي تحمدي ربنا علي اللي انتي فيه بس ارجع واقولك في الاخر برده هو طيب وغلبان والنبي العيبة ما بتطلع من بؤقه (وحياة امك ده بعد اللي انتي قولتيه ده عايزه تتمضمضي بمية نار علشان تكفري عن اللي قولتيه،ده لو سمعك مش بعيد يديكي استمارة 6)
بعد كل هذه الاسباب اللي اكيد في غيرها كتير انا مش عايزه اتجوز لمجرد اني اسكت الناس،لمجرد اني احصل علي لقب متجوزة
في ناس كتير متجوزة بس للاسف بتحاول تمثل انها سعيدة علشان الناس،كلمة الناس دي هي اللي ودتنا في داهية،لازم ابان قدام الناس مبسوطة وماشية جنبه ايدي في ايده (حتي لو ضاربين بعض بالجزم المهم الناس)
لازم اظهر قدام صحبيتي انه مهنيني وشاريلي شئ وشويات علشان ما اديهاش فرصة تشمت فيا،لازم لازم .......... علشان الناس
ايوه مش هاتجوز اي حد والسلام مش هاخد واحد يكرهني في حياتي لمجرد اني خايفة من كلام الناس،وطالما ان ماحدش مرتاح حاول تسمي نفسك (ماحدش) اكيد ساعتها هاترتاح،وبطلوا بقي كلمة الناس دي لان الناس هاتقول في كل الاحوال المهم
انتي عايزه ايه؟؟؟؟؟؟؟
أنا عن نفسي مش عايزه اتجوز والسلام
انا عايزه اعيش بسلام!!!!!!!!!!!!!!!!1
بقلمي
ليست هناك تعليقات:
إرسال تعليق