عاملين ايه يابنات،طيب والله ليكم وحشة معلش كنت مختفية الفترة اللي فاتت كانت ظروف بقي،بس انتوا تفتكروا إن الغيبة دي كانت دون سبب؟؟؟؟؟ لاء طبعا أنا الفترة اللي فاتت بس كنت مصابة بحالة من هستريا الضحك علي العاهات أقصد العرسان اللي بنقابلهم اليومين دول بعيد عن السامعين أصل كل واحد يااوختي انتي وهي معاه شقة اليومين دول بيتفرد ويتني علي ايه مش عارفه(والله خلق ما يعلم بيها الا ربنا)
شايفة كل واحدة والتانية بتسغوري كده بعينها مش عاجبها اللي بقوله وبتقول هو حد لاقي ما تتلمي بقي بس معلش ما انتوا لو تعرفوا الحقيقة هاتعزروني ،المهم ما اطولش عليكم في يوم من ذوات الايام اللي الواحد فيها نص يومه نايم والنص التاني عايز ينام قالولي بســـــــــــــــــــــــــــــــــــــــنت جالك عريس ومصمم يقابلك ويشوفك،لازم تقابلية وتتكلمي كويس،بلاش تصنع في الكلام خليكي علي طبيعتك،البسي كويس والوان فاتحة بلاش كأبة الله يرض عليكي وحطي حاجات تفتح الوش كده وخلي مخارج الفاظك واضحة (طب والله لو كانوا ادوني النصايح دي وانا رايحة الانترفيوا بتاع فودافون لا كنت اتقبلت من أول مقابلة) والزن اشتغل بقي ده عريس جاهز وعنده شقته،فضلت أجيب الموضوع في دماغي يمين وشمال قولت وماله حد لاقي حد كده في عيد ميلاده يدخل عليه بهدية والاقيه بيتصل بيا في يوم يقولي انتي فين ياهانم أنا ماعنديش حد يقعد بره البيت لحد 1 الظهر (وحياة خلتك!!!!) ده هيكون ردي عليه في النقطة دي ساعتها:)
المهم الخيال بدء يشتغل في دماغي والعملية وسعت أووووي وصلت لتخيل صورة صفحتي وصفحته واحنا كاتبين
(verlobt)
ما تستغربوش ده ألماني أصلي ليسانس ألسن الماني وناوية أعمل دراسات عليا ان شاء الله حدش عنده شغل ياخونـــــــــــــــــــــــــــا
ما علينا يعني هي دي اللي هتبقي عدلة والله ماعدتش تفرق سينا من سونيا،ولا بقي ياسلام لما يكتبلي بحبك يابجرة ولا يادموسة الله اللـــــــــــــــــه علي الرومانسية وفضلت أدندن مع نفسي عريسي جيه أه الحلو أهو أه
وطبقا للتعليمات الواردة من مجلس قيادة الثورة اقصد الاسرة فقد أعدت العدة لمقابلة المغفور له أقصد المذكور أعلاه،ولازال التخيل مستمر حيث تصورته دنجوان العصر الذي سيكتب له التاريخ إنه خطب واحدة مثل حضرتي عندها الكتاب هو خير حبيب وصديق واللي يسألني اشمعني يعني الكتاب اللي اخدتيه حبيب أقوله أنا سعيدة إنك سألتني السؤال ده هههههه،وردا علي هذا السؤال هو ان عمركم سمعتم عن ان فيه علاقة حب فشلت ولاقت طريقها للانهيار بين فتاة وكتاب؟؟؟؟؟؟؟؟؟؟؟؟؟؟؟؟ لاء طبعا ماحدش سمع
وهو ده سبب حبي للكتاب والقراءة لاني بحس ان كل سطر فيه مكتوب ليا (مش ولاد اليومين دول حدث ولا حرج قلب الواد من دول سفينة تيتانك جنبه تبقي صغيرة) المهم عمالة اقول يارب يعزمني علي حاجة عدلة ويدفع هو (ما داهية لا يقولي ماعكيش فكة تبقي نصيبة سودة هو انا لاقية أكل لما كمان هدفع تمن العزومة)
وبيني وبينكم الشباب دلوقتي نوعين واحد معاه شقة وعايز يتجوز فيتنك علي اهالينا،عايزها قمر 14 وموزة كده وشعرها طويل(واحنا هنفصلك واحدة علي مزاج سعاتك
أو واحد تاني بقي لا معاه شقة ولا نيلة بس مقضيها مسدات وعاملة ايه ياحياتي النهاردة،انا مش بعرف انام الا لما اسمع انغام صوتك (الغام تسور ودانك يابعيد) مافيش حد في حياتي الا انتي (وهو مظبط 5 وبيبصبص ل 11 وعامل 15 كباري يعلق عن طريقهم بنات) وهذه النوعية في أخر المطاف يميل علي ودان امه ويقولها جوزيني ياست الكل هو انا بردوا استجري ارفع عيني في واحدة
ياحونين
وجاءت لحظة الحســــــــــــــــــم يوووووووووووة اقصد لحظة المقابلة أنا اتاخدت في الاول بيني وبينكم كنت عايزه أجري بس قولت مش مشكلة الشكل المهم الاخلاق،خدت 5 دقائق مع نفسي كده اراجع أسئلة المنهج اقصد الانترفيوا الاصطنمبة دي يوووه اقصد ما علينا فضلت اقول اسمي كذا كذا ومتخرجة من كذا كذا وهواياتي إلــــــــــــــــــخ،يعني اسئلة ممكن تتجاب من علي النت عادي بس ربنا يسهل ما يقولش هارد عليكيي بعد اسبوع لحد لما المدير يقرر أقصد اهل العريس يشاورا بعض (خلاص الواحد ما بقاش يكل من حركات التوزيع دي)\
المهم قعدنا واتكلمنا في كل حاجة في البلد (سيبنا الشخصية والصفات والتعارف)ومسكنا في الوضع الراهن الذي يكمن في المشاكل النفسية اللي طفحت علي سلوكيات المواطن المصري (كان ناقص شوية ونحلل علاقة مصر بالدول الاروبية) بس اللي يجيب الظغط انه ساب كل المميزات اللي في العروسة وقال عليها لاء دي شكلها صغير حاجة كده عاملة زي أنا بقرف من البطيخ علشان جواه بذر اسود اهو تلكيكه وخلاص بقي
هو انت فاكر انك لما تقول لاء هانزعل يااموووووور
ده احنا هانعمل لولولولولولولولوي فرح يااموووووووووور
بقلمي
بسبوسه..البرنسيسه
ليست هناك تعليقات:
إرسال تعليق