النهاردة ابتدي اليوم عادي خالص كأي يوم في حياتنا صحيته من النوم وحضرت الفطار علشان أودي بنتنا الصغيرة استشهاد المدرسة وماتصتغربوش من الاسم هي الاسماء دي عادي عندنا وابوها اتخانق معايا كتير علي الاسم بس علي مين انا بردوا اللي مشيت الكلمة مش اغلبية في البرلمان هههههههههههههه المهم ماطولش عليكم فطرنا وكان الكلام قليل لان كل واحد ماسك الجرنال بتاعه بيشوف الاخبار.هو فاتح المصري اليوم علشان كمان يعرف ماتش الزمالك مع الاهلي في نهائي الكاس الساعه كام النهاردة وانا فاتحة الحرية والعدالة بشوف اهم البرامج النهاردة فلمحت ان لقاء المرشد النهاردة الساعه 8 فاقولتله اعمل حسابك علي لب وسوداني لان في برنامج النهاردة الساعه 8 والمرشد جاي قالي لا لا لا انسي الساعه 8 ماتش الزمالك في نهائي الكاس ابقي شوفي البرنامج في الاعادة,فولتله ياسلام ماتشوف انت الماتش في الاعادة.
قالي الزمالك هيلعب مع الزفت الاهلي في نهائي الكاس واظن انك مش مستعده تقعدي عند امك انتي وبنتك قد شهر فاستهدي بالله وادعي الزمالك يكسب قولتله ان شا الله عنه ما كسب.المرشد يعني المرشد سمع كده راح قام من علي الفطار وراح الشغل وانا وديت استشهاد المدرسة وروحت البيت اشغل التليفزيون لاقيت الدش فاصل يالهوييييييييييي وبعدين ده هيجي يفصل دماغي عن جسمي.
فضلت احاول مع الدش مافيش والوقت عدي والبت جات من المدرسة وانا ماعملتش الاكل وفجاءة الجرس بيرن هو هو ده جيه بدري.
فتحت الباب دخل واخد نفسه وقالي حضري الغدا علشان الحق انام علشان الماتش بالليل قولتله ما فيش اكل مالحقتش اعمل الدش فاصل كنت بظبته بصلي والشر طالع من عينيه وماقلوكوش بقي علي الشتايم اللي سمعتها ههههههههههه.
حضرت حاجة سريعه كده وهو بيظبط في الدش علشان الماتش وانا بقي في المطبخ باكل في نفسي وعمالة اقول والله لاتفرج علي لقاء المرشد وجات الساعه 8 الا ربع
فأنا قولتله ياحبيبي كده كده انت عارف ان الاهلي هيكسب فبدل ما تحرق دمك هات البرنامج راح رد وكده كده انتي عارفه اللي المرشد هيقوله ما انتوا طالعين في كل حته اهو كلام بيتعاد وقومي من وشي بقي وروحي ذاكري لبنتك هي اسمها ايه استقتال ولا استشهاد دي
أنا هاتفرج علي البرنامج وانا هاتفرج علي الماتش
هات الريموت.اغزي الشيطان وسيبي الريموت
بقولك هاشوف المرشد هيقول ايه
وانا بقولك هاشوف الزمالك هيعمل ايه
وفجاءة سكتنا احنا الاتنين اصل الكهربا عملت قافلة والتليفزيون اتحرق
لو حد فيكم ياجماعه عرف نتيجة الماتش وتابع البرنامج يبقي يقولنا ادينا لا طولنا ماتش الزمالك ولا لقاء المرشد
بقلمي
ليست هناك تعليقات:
إرسال تعليق