أنا حلوة وست الكل..بروفيلي زي الفل

عاملين ايه ياشباب،غيبت عليكم فترة بس معلش أصل كنت مشغولة في الخطوبة بتاعتي اللي اتفركشت من قبل ما ألبس الفستان والدبلة،قال ايه نزلت صورة لعروسة بتجري وري عريس وكتبت عليها"امسك عريس" يالا مالهوش في الطيب نصيب.
عايزه أفكركم بأيام زمان،فاكرين لما كان الواحد يعوز يتجوز يروح لأم زعبلة الخاطبة علشان تشوفله عروسة ويقولها أنا عايزها قمر،تقول لمرلي مورلو قومي وأنا أقعد مطرحك،يكون شعرها طويل وبيضة وعينها عسلي(ده علي انه دنجوان عصره،وهو أصلا يقول للقرد وسع أقعد مكانك).
فاتقوله أم زعبلة من عنيا وليا الحلاوة لما يتم المراد،تروح أم زعبلة وتكلم أهل العروسة وتجيبله صورة للمغفور لها لانه طبعا ممنوع يقابلها ويتكلم معاها.ويشوف العروسة،يشوف السلعه اللي هيشتريها تستحق ولا لاء،لا يبص بقي لفكرها،أخلاقها تصرفاتها وطريقة معاملتها مع الأخرين،هو عايز واحدة تنطبق عليها مواصفات معينة مش مهم بقي هيتفاهم معها ولا لاء ويرجع يلعن اليوم اللي فكر يتجوز فيه.
والدنيا تتقدم شوية بشوية ونشوف الحبيب اللي بيحب بنت الجيران اللي ساكنه قصاده.ويبقي سهتان علي روحه ومدهول،ينام كل يوم علي أنغام عبد الحليم وهو بيقول بتلموني ليه،ويصحي علي أغنية موعود معاك بالعذاب ياقلبي وبعد كده يفتح هو الشباك ويغني وسط مسمع ومرئ من الشارع كله :جبار في حلاوته جبار"
ويجي ابوه يروح لاسعه علي قفاه علشان اتأخر علي المدرسة،يجري الواد من الغرفة ويقعد أبوه يسبل هو،لحد لما أبوها يطلع يشتمهم بشجرة العائلة كلها،فنلاقي الواد وأبوه بيغنوا في نفس واحد"توبة ان كنا نعاكس تاني مرة توبة"

شوية بشوية نلاقي الواد بيحب بنت من مدرسة البنات اللي جنبهم،حبها من جيبتها اللي فوق الرقبة وتشوفه وعينيه باظه علي الرقبة(ولا بلاش نظلمه يمكن عايز يسئل علي ماركة الجيبة علشان يجيب واحدة لاخته).يروح واقع في حبها،يخرج معها ويروحوا جنينه الاسماك اللي في كل الافلام العربي القديمة وبردوا أبوها يقفشهم وينكسر قلب روميو اللي وقع في حب جوليت وياخدله يومين يسمع أغاني كلها جراح وذكريات وعلي رأي عمكم محمد فؤادد "رجع شريط حياتك..قلب في ذكرياتك"

وفي بقي حب بتاع التليفون،الشاب الرايق يضرب أي رقم يجي في باله فاتطلع بنت صوتها حلو تروح ملمسه مع سلوك قلبه،يقع في حبها والبنت طبعا تروح مسمعاه موال جدول الضرب في التليفون ويسمع كمان أحلي الالفاظ وطبعا هو منشكح لان ده دليل علي أدبها (والنبي انت فله)،ويفضل كده لحد أما هو يزهق وده مش بيحصل،او هي تغير رقم التيلفون ولو بقي حصل وشبكت معاه يخرجوا يومين علي الكورنيش وياكلوا ترمس ولب،ويسبل في عنيها شوية وبعدين يزهق،فايشوف بنت تانيه(اقصد نمرة تانية)


واخيرا ياسادة ماحدش من الولاد بعد كده هايروح لخاطبة او هايحب في التليفون ولا هيشوف واحدة تعجبه فيسئل عنها الجيران والاصحاب والاقارب ولا هيسئل عنها شباب المنطقة،هو بس يقعد علي النت ويدخل علي البروفيل بتاعها ويشوفالا ستاتسيوهات جمع استاتيوس اللي بتحطها علي الفيس(اي الجمل اللي بتنزلها علي حسابها الشخصي علي الفيس)

ويسئل عنها من خلال صفحات الاصحاب والاقارب ويجيب اهله يقعدهم قدام النت،أهي يابابا اللي بحبها دي مؤدبة اوي،كليباتها محترمة وكلامها كله معبر اوي وكمان صورها صو كيوت ( so cute) ،يقوم الاب قايل والله ياابني مادام صفحتها محترمة وصفحات اصحابها محترمة خلاص احنا هنلاقي زيها فين؟
وبعد لما الموضوع يتم يجي العريس طالع فيها،شيلي الولاد اللي علي صفحتك،ايه التعليق ده،ايه الصورة دي،ماتقبليش ولاد كلهم مش محترمين(طيب كويس انك انت اللي قولت)
ده علي اساس اننا مش قادرين نعمل اكونت تاني باسم مختلف ونعمل اللي احنا عايزينه.

عزيزي الشاب يوم لما تيجي تختار شريكة حياتك ما تبصش علي لون شعرها،لون عينيها صفحتها علي الفيس تجنن ولا كلامها حلو،شكلها so cute ،علشان ماترجعش تندم،طبعا كل ده شئ مهم بس الاهم الاخلاق والاخترام بينكم.
أصل الجواز ده شركة تعاونية بين اتنين رأس مالها الاحترام،الحب المتبادل والمودة والرحمة.

اوعي بعد كده تبص لصفحتها علي الفيس لاحسن نلاقي كل البنات في يوم كاتبه علي صفحاتهم
"انا حلوة وست الكل..بروفيلي زي الفل"

بقلمي

بسبوسه..البرنسيسه